角力戰

前兩晚, 庭綺同媽媽玩起心理戰來. 話說果晚, 庭綺對魚肝油軟糖特別有興趣, 平時都只會食一粒至兩粒, 但果晚, 就攞住成罐不停食, 媽媽叫都叫佢唔停, 建議佢食羊奶片, 仲同佢講, 呢罐係藥藥, 果罐先係糖糖, 結果佢都係唔理我, 媽媽唯有引開佢注意力的時候, 將罐魚肝油攞走.

事情當然無咁容易就咁解決啦. 庭綺不停喊, 媽媽好有耐性咁遊說佢, 叫佢食糖糖, 佢好聽話咁答: “好”. 媽媽本住好大o既成功感抱住佢, 企嚮藥藥同糖糖面前俾佢選, 結果佢摸摸糖糖之後放低, 攞咗藥藥. 媽媽好失望啊!唯有夾硬攞走罐藥藥. 因為根據罐上指示, 小朋友每日只可以食一粒. 庭綺喊到拆天咁. 媽媽硬住心腸唔理佢, 絶對不能就範, 仲叫姐姐唔好抱佢, 結果, 庭綺喊咗一會, 喺無助, 無靠山的情況下,開始軟化, 屈服, 越坐越近媽媽, 呢個時候媽媽抱起佢, 好實咁攬住佢, 庭綺好似小綿羊咁撲喺媽媽膊頭度. “媽媽講故事俾庭綺聽, 好唔好?” “好!” 就咁, 果晚o既藥藥同糖糖事件就暫告一段落哪.

事情發展到第二晚, 當媽媽放工番到屋企, 庭綺如常地好開心咁幫媽媽開門, 攞拖鞋, 要媽媽抱抱, 然後問媽媽: “食糖糖好唔好?”, 媽媽話”好!”(唔知係唔係平時同佢講野都會加句”好唔好”, 結果庭綺都會好自然咁問”好唔好”, 不過, 總覺得佢講得特別好聽, 哈哈.) 又抱住佢去藥藥同糖糖面前, 結果佢又攞咗藥藥. 食完一粒後, 媽媽話: “俾番媽媽好唔好”, 跟住庭綺就指住糖糖: “藥藥啊!食糖糖好唔好?”媽媽當然答好啦. 今次結果係, 佢真係俾番藥藥媽媽, 然後攞咗糖糖. 哈哈, 媽媽好開心啊. 終於打勝戰.

呢件事令媽媽知道, 原來對於一個兩歲大的小朋友, 都要用d心理戰, 最重要係俾媽媽知道, 原來佢哋明白. 只是扭計, 唔肯合作. 睇黎呢類角力戰仲有排發生. 真係要做定心理準備迎戰哪!!!

written by Jade's mum