細佬好型仔

庭綺三歲哪!

好耐無記錄吓對仔女的近況哪. 原本庭綺讀幼兒班時已經要寫, 拖吓拖吓幼兒班都讀完哪, 幼稚園k1都已經讀咗兩個月哪, 真係啊!個女都三歲哪! 喺屋企攪咗個小型party, 都唔錯, 庭綺好開心, 當大家為佢唱生日歌時, 見佢個樣好enjoy, 好開心咁望住大家, 唔會好似平時咁同人哋一齊唱, 佢知道今次生日歌係為佢而唱. 大個女哪, 望住佢, 媽媽都好開心. 難以描述. 為咗你呢個表情, 媽媽答應每年都會為你慶祝. 生日快樂庭綺!

Disneylands HK 2008

開心全家福@Disneylands HK 2008

狗狗唔好啊@Disneylands HK 2008

Flower Show 2008

庭綺玩完沙沙後話唔再去哪!

媽媽好叻啊!

媽媽番咗工兩個星期哪, 家庭工作都好忙. 早上八點半要送小JadeJade番學, 之後番工, 放工又要坐廿分鐘巴士去嫲嫲屋企接小JadeJade番屋企, 番到屋企又要接力抱細B, 怕yati姐姐攰, 發”蚊憎”. 夜晚又無得訓. 因為細B作休時間仲好乱, 最高紀錄, 一晚要醒五次. 星期六嫲嫲有得放假 (因為媽媽在家), 星期日yati姐姐又有得放假. 媽媽一星期, 一至七無休, 精神同肉體都好疲憊啊! 忍!忍!忍! 只好話俾自己聽, 過咗呢兩年就會好好多…以上係媽媽幾日前o既心態. 前兩日無意中睇咗編文, 意外地 完全想通晒.媽媽應該放鬆心情去enjoy”途中的風景”而唔應該抱住”低著頭,快快趣走完呢段路”o既心情去面對. 哈哈, 好叻啊! 事實上,整個過程媽媽卻實係快樂ga.

written by Jade's Mum

庭綺弟弟出世哪!

hi, 我係庭綺細佬, 小弟 Hubert, 零七年十二月十九日出世啊. 都有7.3磅ga. 都係阿媽懶, 宜家先俾我出場.

第七個1111就咁靜悄悄地過咗哪.....

角力戰

前兩晚, 庭綺同媽媽玩起心理戰來. 話說果晚, 庭綺對魚肝油軟糖特別有興趣, 平時都只會食一粒至兩粒, 但果晚, 就攞住成罐不停食, 媽媽叫都叫佢唔停, 建議佢食羊奶片, 仲同佢講, 呢罐係藥藥, 果罐先係糖糖, 結果佢都係唔理我, 媽媽唯有引開佢注意力的時候, 將罐魚肝油攞走.

事情當然無咁容易就咁解決啦. 庭綺不停喊, 媽媽好有耐性咁遊說佢, 叫佢食糖糖, 佢好聽話咁答: “好”. 媽媽本住好大o既成功感抱住佢, 企嚮藥藥同糖糖面前俾佢選, 結果佢摸摸糖糖之後放低, 攞咗藥藥. 媽媽好失望啊!唯有夾硬攞走罐藥藥. 因為根據罐上指示, 小朋友每日只可以食一粒. 庭綺喊到拆天咁. 媽媽硬住心腸唔理佢, 絶對不能就範, 仲叫姐姐唔好抱佢, 結果, 庭綺喊咗一會, 喺無助, 無靠山的情況下,開始軟化, 屈服, 越坐越近媽媽, 呢個時候媽媽抱起佢, 好實咁攬住佢, 庭綺好似小綿羊咁撲喺媽媽膊頭度. “媽媽講故事俾庭綺聽, 好唔好?” “好!” 就咁, 果晚o既藥藥同糖糖事件就暫告一段落哪.

事情發展到第二晚, 當媽媽放工番到屋企, 庭綺如常地好開心咁幫媽媽開門, 攞拖鞋, 要媽媽抱抱, 然後問媽媽: “食糖糖好唔好?”, 媽媽話”好!”(唔知係唔係平時同佢講野都會加句”好唔好”, 結果庭綺都會好自然咁問”好唔好”, 不過, 總覺得佢講得特別好聽, 哈哈.) 又抱住佢去藥藥同糖糖面前, 結果佢又攞咗藥藥. 食完一粒後, 媽媽話: “俾番媽媽好唔好”, 跟住庭綺就指住糖糖: “藥藥啊!食糖糖好唔好?”媽媽當然答好啦. 今次結果係, 佢真係俾番藥藥媽媽, 然後攞咗糖糖. 哈哈, 媽媽好開心啊. 終於打勝戰.

呢件事令媽媽知道, 原來對於一個兩歲大的小朋友, 都要用d心理戰, 最重要係俾媽媽知道, 原來佢哋明白. 只是扭計, 唔肯合作. 睇黎呢類角力戰仲有排發生. 真係要做定心理準備迎戰哪!!!

written by Jade's mum

抵錫

庭綺的舞姿(瞓時)可能真係遺傳自媽媽, 但肯定青出於藍. 誇張到你唔信. 床頭瞓到床尾, 脚央央不在話下, 最喜歡企起身, 再”鐘”落床, 好似玩笨豬跳咁. 企直, 合埋眼, 忘我, 傾斜, 跌! 有時真係被佢撞到個頭, 肚痛到死又唔敢唉, 怕嘈醒佢. 痛之餘, 仲無得瞓, 雙失!!

庭綺大個哪, 越來越”識玩”, 日頭玩得癲得滯, 夜晚就會喊醒, 最高紀錄係一晚喊醒四次, 媽媽等於唔使瞓!!!!媽媽以前都係個瞓咗就唔知打風落雨0既人, 今時今日, 已經被train到可以全晚處於備戰狀態…不過有一晚, 媽媽好sweet, 原因係有一晚, 庭綺依舊半夜醒咗, 眼仔碌碌, 但無喊, 然後細細聲叫”媽媽”, 媽媽怕”整醒”佢, 有排都瞓唔番, 只好咋瞓唔理佢. 庭綺好乖咁瞓響度”思索”.媽媽唔覺意地陏咗吓脚, 佢以為 媽媽醒咗, 又再細細聲叫”媽媽”, 媽媽依舊唔應佢, 就係呢個時候, 庭綺突破爬到媽媽身上, 錫咗媽媽一啖, 又再瞓低”思索”. 果一刻, 媽媽好開心, 好感動啊, 開心的情緒令媽媽好快就自自然然咁進入夢鄉哪, 連庭綺幾時瞓著都唔知, 只係第二朝見佢依舊舞姿婀娜地在甜睡中.

written by Jade's mum

乖B

大b越來越可愛, 又懂事. 做媽媽的, 真係好開心.
大b好有手尾呢一點媽媽不嬲都好欣賞, 估唔到佢人仔細細, 原來已經有好多優點. 例如, 去街街眼訓, 婆婆抱住佢搏喺膊頭度, 因為婆婆膊頭上的手袋令佢唔舒服, 睡眼惺忪o既大b會自己搏去另一邊. 媽媽見到好開心, 原來我個女好理性, 有障礙, 佢識選擇, 起碼唔會發難渣, 或強行撥走個袋. (哈哈! 可能好多小朋友都會, 但都係想讚吓bb)

媽媽好懒, 經常都訓喺sofa度睇電視, 或者做按摩, 結果就無離開過張sofa, 大b有時想媽媽陪佢, 就會走過來想拖媽媽走. 大肚媽媽邊有咁靈活呀, 就叫佢等等, 等媽媽著拖鞋, 結果佢真係乖乖咁企响度等, 俾時間媽媽. 哈哈, 咁又啖得媽媽好開心哪. 因為佢識聽話. 識俾時間人, 唔會蠻不講理. 真好.

不過有樣麻煩, 就係好鐘意去街街, 只要同佢講去街街, 佢就會即刻去抽屜攞衫換. 見大人去街, 佢會喊住要跟, 搞到d大人成日要走後門. (但條偷走橋唔用得幾耐, 因為佢已開始識穿)

(呢個村姑look出自yati姐姐)

Written by Jade's mum

成個月都無update個blog, 原因係媽媽最近實在太攰了 (精神上), 日日都滿天星, 懶到唔想”旭”. 連帶bb去玩, 去影靚相的心情都無, 抵打!

Bb最近叻咗好多, 開始會跟人口水尾講野, 講一d非曡字的詞或者超級短句. 例如, 雨善姐姐扭計唔行, bb會講: 姐姐. 走! 又例如媽媽自己食雪糕唔俾bb食, bb會喊得好凄涼咁話: 媽媽. “Yai Yai”. 實在太可愛哪. 講起可愛, 有時媽媽真係俾呢個b電到著迷. 哈哈, 媽媽好喜歡從下而上75度角望bb個靚樣, 眼睫毛蹺蹺 , 雙眼皮深而長, 大眼睛, 小嘴巴, 尖下巴, 真係好迷人. (唔好介意媽媽讚得咁盡, 慈母係咁架哪!) 但不幸的是, 佢已經識持靚行兇, 好鬼死惡. 又喜歡尖叫, 媽媽最怕就係尖叫, 好刺耳, 好難受. 都係時候要”調校”吓哪.

庭綺又發燒哪!

好想訓, 好想訓, 每日的體温都處於37.3 ~ 37.4C半發燒狀態, 真係好唔舒服, 想笑都笑唔出. . .

母親節約爺爺嫲嫲去嘆茶, 九點就去到茶樓, 竟然無位, 天下孝子何其多…結果, 十二個人一齊去了M記食早餐. 小朋友最開心. 小JadeJade都玩得好開心.. ..不過回家後竟然發燒了, 38.8C, 食過藥, 訓個覺, 夜晚繼續約會爺爺嫲嫲..

燒無退, 到半夜5點更升至39.1C, 媽媽真係好心急等天光, 好想快啲可以帶庭綺去看醫生, 因為真係萬二分唔想再送佢入院.

終於等到天光, 庭綺燒退至38.6C, 但郤流鼻血. 嚇到媽媽即刻急call嫲嫲帶庭綺去睇醫生. 依家庭綺都未退燒, 但嫲嫲卻要求庭綺今晚留喺佢屋企訓. 雖然媽媽都好想痛快訓一覺, 但庭綺今晚都唔知退唔退燒, 媽媽點放心啊! 今晚都唔知點應付嫲嫲的一片苦心…

庭綺快啲好番啦!

written by Jade’s mum

五一公園遊

阿b點解有種眾人皆醉我獨醒的悠然自得神態!!!

媽媽終於放棄學業哪. 原本星期日又要返學, 依家唔使哪, 想起都開心, 又唔使臨急趕功課, 趕到三更半夜. 前幾天考試, 結果掛住温書, 根本就無時間陪庭綺, 後果是, 小朋友的反應太直接哪, 佢竟然唔要我, 對我的眼神有敵意, 就連掂吓佢, 都唔俾. 雖然, 我一向都認為親情是與生俱來的, 也自然而生的, 所以也不會過份緊張, 要庭綺每一刻都屬於我, 但果刻, 俾佢撥開隻手時, 真係好心傷. 考完試後, 我就好積極咁日陪夜陪, 當然依家情況大為改變, 每日返到屋企, 佢就會拖住我, 行來行去, 佢開心, 我仲開心.

以前, 總覺得庭綺大伯好好, 好偉大, 成日都會帶雪雪晴晴去公園, 冒險樂園玩, 呢啲都不是成年人喜歡去的地方, 但佢郤願意換自己的時間俾兩個寶貝女. 不過, 依家媽媽都做到, 用自己難得的假日帶庭綺去公園玩, 好叻, 好偉大啊, 哈哈...(唔好咁傻啦, 爸爸會以為你第一次帶阿b去公園哪!)

written by Jade's mum

今日係庭綺歲半生日, happy birthday!哈哈!
庭綺係一個較其他小朋友要大膽的小女孩, 因為佢一d都唔驚狗, 而且好鍾意, 見到狗佢就好開心, 有時喺車度見到行人道上有狗, 佢就會手指指, 示意叫媽媽睇..上個星期, 媽抱住庭綺, 喺youtube度search咗d有狗狗的vedio俾佢睇, 依家, 晚晚媽媽回到家, 佢就會拖住媽媽要去睇狗狗, 仲會自己企圖按電腦個開闢掣tim...真聰明...(hhb, 請唔好怪我咁讚自己個女啊)

wirtten by Jade's mum

恭禧爸爸, 好叻啊!

媽媽拆咗庭綺張bb床哪

不經不覺庭綺就快歲半哪, 這年多的日子, 庭綺長大很多, 由出世時的超細碼, 到依家已經追平兩歲大的蓓蓓同瑤瑤兩孖女哪 (不過佢哋都係超細碼). 擒晚, 媽媽, 哈哈, 拆咗庭綺張bb床哪, 哈哈, 哈哈哈. (真係難以掩飾媽媽興奮心情 >0<)

星期六參加咗栩栩個生日扒地, 大大小小十個小朋友, 難得的大聚會, 可惜烏龍媽媽嗰日帶咗相機, 又無帶memory card, 結果一張相都無影到, 真掃興, 好在有個好nice o既蔡叔叔話會寄比媽媽. 等媽媽收到時再post啲靚相哪. (其實有無人懷疑過係唔係媽媽想”呃”啲高質素的相呢, hehe)

唔知係唔係庭綺玩的特別開心, 回到家, 食完飯, 未到七點, 已攰到訓咗哪, 一覺訓到第二朝九點先醒, 厲害厲害. 從未試過. (但媽媽”迎”住佢就醒就醒, 結果, 嗰晚捱到兩點先訓). 聴婆婆講, 大庭綺三個月o既小強表哥, 每晚九點就訓, 唔似庭綺每晚都十二點, 一點先訓, 媽媽不知幾羨慕, 表哥有咁好的習慣, 媽媽又可以有多點私人時間. 但諗深一層, 如果庭綺每晚都咁早訓, 對要上班的媽媽黎講, 豈不是見少咗, 陪少咗. 所以, 媽媽都係唔糾正佢的作息時間哪, 等佢再大啲再算啦. 庭綺啱啱出世時, 朋友同事都建議要誡咗庭綺夜奶習慣, 唔使媽媽咁辛苦, 但媽媽覺得無呢個必要, 成長o既每個階段都有唔同需要, 點解要硬性改變, 就算辛苦也不過是幾個月, 有幾大不了. (好天真啊! 原來無覺好訓的日子係自你個bb出世之後一直持續ga, 努力啊!), 但事實係, 四, 五個月之後, 庭綺就自己誡咗哪. 其實只要不強制加工, 變更, 一切都會順其自然咁發生…

written by Jade's mum

Jade Loves Shopping

小jadejade的神態, 手勢, 十足一個闊太喺度shopping. 好搞笑. 三歲定八十, 趁佢未三歲, 仲有得教, 唔驚唔驚.

啟示

各位, 媽媽跌咗電話落水, 屋企電話又壞咗, 除咗落街打電話 (希望媽媽記得你的電話no.), 就和呢個世界隔絕了, 如果想找我就留言吧, 或msn (may_yeung_hk@hotmail.com). 希望easter完之前可以回覆正常啦.

好大壓力, 睇見各位爸爸媽媽都努力地在為bb寫blog時, 真有點愧對庭綺. 其實媽媽真的好想好想密密寫, 將庭綺每個成長過程, 生活小片段都記錄落來. 每個微笑, 每個動作, 每句說話都不想忘懷. 放心, 媽媽會努力, 努力地”豐富”庭綺.

當有日, 庭綺發現朋友仔個blog都係由爸爸媽媽一齊操刀時, 千萬不要錯怪爸爸. 爸爸好錫庭綺, 比媽媽更錫庭綺. 但爸爸好忙, 忙於為庭綺, 為媽媽, 為一家的將來而籌謀. 爸爸沒時間和媽媽一齊寫blog, 但爸爸每日都會抽時間瀏覽庭綺個blog. 看看媽媽的留言, 看看可愛的庭綺. 問問媽媽, 有無教庭綺學字, 有無給庭綺聴歌, 有無帶庭綺到公園玩, 庭綺今天開不開心, 做了些什麼, 學懂了什麼, 有無掛住爸爸…好多好多o既掛念….

written by Jade’s mum

Flower Show 2007

Cool Slideshows

Music and Lyrics

Way back into love-(K歌情人)
自庭綺出世後, 爸爸媽媽己好耐無入戲院睇戲哪, 所以要做少少野紀念吓. (不過媽媽仲未知可以點樣upload d歌, 所以唯有link去人哋個blog頂住先啦, 哈哈.)

驚天大發現.又一張皇牌!

原來庭綺的掌紋和媽媽的有99.9%相似.自古以來都知道掌相可以計算人的命理, 換言之, 庭綺將會有和媽媽接近一樣的命運, 所以如果爸爸希望庭綺將來幸福快樂的話, 今日開始就要加倍珍惜媽媽哪, 哈哈哈!!!!好一張皇牌, 簡直如獲至寶......哈哈哈哈哈哈!

我哋國家o既國旗啊!!!

“我哋國家o既國旗啊!!!” 出自八歲大的浩文表哥 (超級痛錫+特別照顧庭綺的表哥). 令人有點咢然.

北京遊, 一行大小十二人, 有老有嫩, 壯丁得兩個, 真不是一個簡單, 輕鬆旅程. 幸好一切順利, 且開開心心的完結. 比預期的要好. (一額汗 :P )

第一站是萬里長城. 由八逹嶺上, 雖然導遊姐姐帶我哋係長城內圍行了一段, 減輕了難度, 但還頗辛苦的. 幸好小朋友都無扭抱. 不過最值得讚係爸爸, 由此至終, 全程抱著庭綺, 不折不扣地當了一個好漢. 掌聲鼓勵!!!

整個行程最大收穫的是庭綺, 每日都有一二十人逗開心, 每晚和姐姐哥哥玩到癲, 難為爸爸媽媽無覺好訓 (因半夜會喊醒). 不過, 庭綺好似學懂了很多, 梯級絆倒了兩次, 就學識按著牆身行或古惑地招手叫人扶; 幫佢著衫, 佢又曉舉高手; 最不可思議的是, 媽媽放工回家, 懶洋洋地坐喺sofa度, 庭綺竟然幫媽媽拎對重重的boot到門口, 最神奇係, 佢竞然仲可以喺眾多的鞋群中拎咗媽媽隻拖鞋到媽媽面前. 那一刻, 媽媽好開心, 本以為佢攞對鞋去玩, 出乎意料之外, 原來庭綺好聰明, 且好細心. 似乎有某種元素已經喺庭綺體內起了微妙變化. 這階段的庭綺應該還有很多很多令人意料不到的事情發生吧! 期待更多的驚喜…

written by Jade's mum